Fandraisana ara-teknika ny tetezana Manambery eo amin’ny RNS5A : Dingana lehibe hoan’ny fifamoivoizana eo anelanelan’i Vohémar sy Sambava.

Tontosa omaly ny fandraisana ara-teknika ny asa fanarenana ny tetezana Manambery, izay hita eo amin’ny PK 173 amin’ny lalam-pirenena RNS5A, mampitohy an’i Vohémar sy Sambava.

Tonga nanatrika izany ireo solontenan’ny DRTP SAVA, BE SETEC Madagascar, ary ny orinasa CRBC, izay nanatanteraka ny asa.

Araka ny fanazavan’ireo teknisianina, dia voaray ara-teknika ny asa fanamboarana, midika izany fa mifanaraka amin’ny fepetra teknika takiana ny fotodrafitrasa.

Na izany aza anefa, dia mbola mitohy ny asa fanatsarana, toy ny fanadiovana sy fametrahana fitaovana ho fiarovana sy fifehezana ny vesatra.

Efa nisy ihany koa ny fitsapana vesatra natao. Nambaran’ireo manampahaizana sinoa avy amin’ilay orinasa mpanatanteraka, fa tokony tsy hihoatra ny 30 taonina ny lanjan’ny fiara mandalo eo ambonin’ny tetezana, mba hisorohana ny loza mety hitranga.

Manan-danja lehibe ho an’ny toekarena sy ny fifandraisan’ny mponina ao amin’ny faritra SAVA ity tetezana ity, satria mampifandray ireo distrika roa lehibe ao amin’ny Faritra dia i Vohémar sy Sambava.