LALAMBE MIGODANA ANTANANARIVO-TOAMASINA : FANARAHAMASO AKAIKY NY FIZOTRY NY ASA

Nidina ifotony androany, Talata 15 Jolay 2025, toy ny efa fanaony isam-bolana, nijery ny fandrosoan' ny asa amin’ny Lalambe Migodana mampifandray an’Antananarivo sy Toamasina ny Minisitry ny Asa Vaventy RAFIDISON Richard Théodore, niaraka tamin’ireo ekipa teknisianina avy amin’ny Minisitera sy ny solontenan’ny Orinasa SAMCRETE mpanatanteraka.

Fitsidihana fanaraha-maso ho fanamafisana ny hafainganam-pandehan’ny asa.

Raha indray mandeha isam-bolana izany teo aloha, dia natao in-2 na in-3 isam-bolana tato anatin’ny roa volana lasa izay.

Mandroso ny asa, ary ho fampitomboana ny vokatra mandritra ity iray volana ity, dia navondrona sy nohamafisina ny paikady rehetra efa nampiharina hatramin'izay:

nampitomboina ny isan’ireo "sous-traitants" sy ny fifanarahana mifandraika amin’izany.

nampitomboina ny ora fiasana, na atoandro na alina, hahafahana mahazo vokatra tsara isan’andro.

nampitomboina ny fotoana iasan’ireo teknisianina Injenera avy eto anivon’ny Ministeran’ny Asa Vaventy sy ireo iraka mpanara- maso na mission de contrôle, ho eny an-toerana foana na "en permanence".

Tanjona lehibe ny hahavitan’ny 8 kilometatra voalohany amin’ity Lalambe Migodana ity, izay horakofana tara. Hotratrarina mialohan' ny fahatongavan’ny Fihaonana an-tampon' ny SADC, amin’io volana Aogositra ho avy io izany.

Hentitra ny toromarika nomen’i Minisitra ny amin' ny hanafainganana ny asa.

Tsy maintsy tanterahina tsara koa ao anatin' ny fenitra sy ny kalitao anefa izany.