RNP6 : FANOMANANA FOTOTRA HO AN’NY FANARENANA NY TETEZANA IFASY SY MAHAVAVY

Natomboka androany tao amin’ny Distrikan’Ambilobe ny fanadihadiana ara-panjakana ho an’ny fanarenana ny Tetezana Ifasy (PK 537+100) sy Mahavavy (PK 568+720), izay samy anisan’ny fotodrafitrasa ao amin’ny Lalam-pirenena faha-6 (RNP6).

Ity fanadihadiana ity dia ampahany amin’ny fanomanana mialohan'ny fanombohana ny asa, izay tanterahina miaraka amin’ny tetikasa PCMCI.

Tonga nanotrona izany ireo manam-pahefana ao an-toerana, sy ireo solontenan’ny vahoaka, izay manan-danja amin’ny fanehoan-kevitra sy fanolorana soso-kevitra momba ny tetikasa.

Ankoatra izany, nanomboka ny fanomanana ny fametrahana ny fototry ny tetezana vonjimaika na ny "pont modulaire" vaovao eo amin’ny Renirano Mahavavy, ho fanoloana ny tetezana efa simba.

Ny orinasa COLAS no hiandraikitra ny fanatanterahana ara-teknika amin’ity asa fanamboarana ity.

Izao hetsika izao dia dingana iray lehibe amin’ny fanarenana sy fanatsarana ny fotodrafitrasa ao amin’ny faritra avaratr'i Madagasikara.

Kendrena ny hanatsarana ny fifandraisana ara-pitaovana, hanamora ny fivezivezen’ny olona sy ny entana, ary koa hanamafisana ny fihodinan’ny toekarena isam-paritra.