Semaine de l’Industrialisation de la SADC 2025

Nanomboka amin'ny fomba ofisialy ny andiany faha valo amin'ny herinandron'ny fampiroboroboana ny indostrian'ny SADC izay hetsika mifanindran-dalana amin’ny andiany faha-45 amin'ny fihaonana an-tampon'ny SADC ho tanterahina eto Madagasikara.

Nohamafisin’ny Filohan’ny Repoblika Andry Rajoelina nandritra ny fandraisam-pitenenany fa ny indostria no kitro ifaharan'ny fampandrosoana an’i Madagasikara sy ny faritry ny SADC iray manontolo. Nozarainy ihany koa ireo fanamby sy ireo ezaka efa nataon'ny Fitondram-panjakana malagasy amin’ny lafiny fanatsarana ny famokarana sy fanodinana ireo vokatra ary ny famokarana angovo. Niantso ireo mpandray anjara rehetra amin'ity hetsika ity ihany koa ny Filoham-pirenena hanohy ireo asa amin'ny fanamafisana ireo rojo-pihariana, ny fampitomboana ny famoronana asa ho an'ireo tanora amam-behivavy, ny firosoana amin'ny fampiasana ny angovo azo havaozina, ny fanavaozana ny rafi-pamokarana sy ny fomba fambolena ary ny fanetsehana ireo fampiasam-bola sy fiaraha-miasa amin’ny sehatra tsy miankina.