VOIE RAPIDE Ivato-Ambohitrimanjaka : HISOKATRA AMIN’NY VOLANA AOGOSITRA IO NY TAPANY FARANY

Hisokatra amin’ny fiandohan’ny volana Aogositra ho an’ny besinimaro ny tapany farany amin’ny Voie Rapide manomboka eo amin’ny Rond-Point Ivato Don Bosco hatrany amin’ny Rond-Point Andranotapahana.

Manodidina ny 4 km ity ampahany farany ity, izay nahitana fanelingelenana kely tamin’ny fanatanterahana, saingy efa eo amin’ny dingana famaranana tanteraka amin’izao fotoana izao.

Nitsidika teny an-toerana androany ny Minisitry ny Asa Vaventy RAFIDISON Richard Théodore, nijery ny fandroson’ny asa sy ny fahavononan’ny fotodrafitrasa ho amin’ny fanokafana.

Mikendry ny hanamaivana ny fitohanan’ny fiara eo amin’ny lalana mampifandray ny Renivohitra sy ny Seranam-piaramanidina Ivato ity Voie Rapide Ivato-Ambohitrimanjaka ity.

Hifandray mivantana amin’ny Village artisanal Ambohitrimanjaka sy Boulevard de l’Europe (67Ha Ankasina) izany, rehefa vita tanteraka.

Etsy ankilany, mitohy ihany koa ny asa fanitarana ho 4 voies ny lalana manomboka eny amin’ny Rond-Point Tsarasaotra, mandalo an’i Lake Iarivo, hatrany amin’ny Seranam-piaramanidina Ivato.

Tanjon’ny tetikasa manontolo ny hanatsarana ny fifamoivoizana sy hampihenana be ny fotoana lany amin’ny dia mankany sy miala ao Ivato.